وزارة الداخلية ،،،،، نأسف للإزعاج!

كثيرا ما استمعت لهذا السؤال فى الايام الاخيرة “ليه تروحو عند وزارة الداخلية ماهم سايبين لكم الميدان “؟

حقيقة السؤال يجيب على نفسه .. فقبل ان اتحدث عن شئ اريد فقط ان اذكركم بالمدعو مدحت شلبى -الشهير بشلبوكة- ماذا قال عن ميدان التحرير قبل الثورة؟ الم يكن ينتوى النزول الى ميدان التحرير بطبل بلدى ليرقص اذا تأهلت مصر لكأس العالم؟ فما الذى اعطى لهذا الميدان قيمة وحوله من ميدان للرقص الى ميدان للثورة؟

يا صديقي، إنها الدماء .. دماء الشهداء والابطال التى سالت فى الميدان خلال 18 يوماً منذ اندلاع أحداث الثورة ، فهى وحدها من اعطت للميدان قيمة لاشئ غيرها

ولكن حينما يُحَوِّل البعض الميدان لنزهة صباحية يتنزهون فيه ويلتقطون الصور بجوار الجدران الموجودة فيه جالسين كما في مقاهي يشربون الشاي، فكان لابد لنا ان نبحث عن مكان جديد، فلن يصمت الثوار ليتحولوا الى حيوانات يزورها البعض فى ميدان التحرير ثم يذهبون الى منازلهم تغمرهم السعادة بعد ان قضوا اوقاتا سعيدة.

من خلق للتحرير قيمته يستطيع ان يخلق بدلا منه ألف ميدان للحرية … فمحمد محمود هو ميدان تحرير جديد ، وماسبيرو ميدان تحرير جديد ، وشارع منصور ميدان تحرير جديد ، بل واستاد بورسعيد هو ايضا ميدان تحرير جديد.

فالذى يصنع للمكان قيمته هو من فيه من بشر وليس جدرانه .. ودماء الثوار ستصنع من مصر كلها ميادين للحرية والتحرير.

لن يقف امامنا حواجز خرسانية فلقد تجاوزنا جميع الحدود وتخطينا كل الاسوار .. خرجنا نطالب بالحرية لبلدنا ولن نعود الا بها لنا ولأولادنا؛ حتى وان كان البعض لديه ذعرا من الحرية.

نعتذر لكل من تضرر مستيقظا منزعجا من غفلته على صرخة ثائر يموت، كان علينا أن نتأدب بحكمة ذائفة ونموت في صمت ونمتنع عن إيقاظ ضمائركم البالية

                                  نأسف للإزعاج

مــا أشـــبه الليلـــــة بالبارحـــــة

- صفحة كلنا (مينا دانيال) : وانت نازل متنساش تكتب اسمك على ايدك ورقم تليفون حد من أهلك لو حصلك حاجة الناس تكلمه

 

- حركة 6 ابريل : سنشارك وبشكل رسمى فى مظاهرات 25 يناير

 

- (حزب الحرية والعدالة) : لن نشارك فى اى مظاهرات او مسيرات تهدف الى المساس باستقرار الدولة والوقيعة بين الشعب و (الجيش وسننزل فقط للاحتفال بالثورة)

 

- (اللواء عتمان) : نحن لا نعادى الشباب .. هل يعادى الاب ابنائه

 

- (الصفحة الرسمية للمجلس العسكرى) : لم نكن يوما نتطلع الى السلطة

 

- جريدة الجمهورية : مخطط احراق مصر

 

- البرادعى :  قررت الانسحاب من الترشح للرئاسة فالنظام (السابق) يبدو كأنه لم يسقط، وضميرى لا يسمح لى بأن أترشح للرئاسة إلا فى اطار ديموقراطى حقيقى

 

- الشيخ محمد حسان : لو سقط (المجلس العسكرى) لن نأمن على انفسنا فى غرف نومنا

 

- جريدة الشروق : القبض على 4 من نشطاء حركة 6 ابريل وذلك اثناء توزيعهم منشورات تحث على المشاركة فى مظاهرات 25 يناير

 

- اليوم السابع : (الشيخ سيد عسكر) يترأس الجلسة الاولى لمجلس الشعب المقرر انعقادها يوم (23 يناير 2012)

 

- (جريدة الحرية والعدالة) : (ماسك بانديتا) خطة (الاناركيين) لنشر الفوضى

 

-  (عنان) يتوجه الى الكاتدرائية لتهنئة الاقباط بمناسبة عيد الميلاد وغضب فى صفوف الاقباط من استقباله فى الكاتدرائية على خلفية احداث (ماسبيرو) الاخيرة وما وقع فيها من شهداء

 

- يوم 25 يناير هيبقى يوم نعبر فيه عن غضبنا .. فى ناس بتموت من التعذيب زى (عصام عطا) وناس بتتسحل فى الشوارع من الشرطة (العسكرية) وناس بياخدها (الامن الوطنى ) يخطفها ويعذبها وناس مش لاقية تاكل وبتاكل من الزبالة  …

 

و الشعب (مازال)  يريد اسقاط النظام

موعدنا 25 يناير 2012

 

*  استبدل العبارات المكتوبة باللون الاحمر بعبارات من عندك  وستحصل على تقرير وافى عن 25 يناير 2011

 

 

 

 

 

 

 

 

 

 

السلطة للشعب وليست لمجلس الشعب

اشعر بحالة من الضحك والغضب فى نفس ذات الوقت كلما استمع الى مبادرة تسليم السلطة لرئيس مجلس الشعب المنتخب

اضحك سخرية من مَن يعيدون التاريخ من جديد ، فأشعر وكأننا رجعنا ل 25 يناير 2011 لنسلم السلطة لمجلس الشعب بدلا من المجلس العسكرى وننتظر عام اخر حتى نرى انهم لا يصلحوا للمرحلة الانتقالية ثم نخرج بثورة جديدة ونظل فى دائرة مغلقة

وأغضب كثيرا حينما اتذكر شهداء ومصابين محمد محمود والقصر العينى الذين تركهم اعضاء مجلس الشعب الحالى وانشغلوا بتعليق دعايتهم الانتخابية وكم كرسى سيحصدون .. الساكت عن الحق شيطان اخرس فهل ستسلمون السلطة لمجلس من الشياطين؟ أليسوا شركاء للمجلس العسكرى فى جرائمه بسكوتهم؟؟

إن أردت أن تقوم بثورة فعليك ألا تقبل بأنصاف الحلول ثانية ، عليك أن تخرج مطالبا باسقاط النظام الفاسد ولست مطالبا بتسليم السلطة لتجار الكراسى

لا تكونوا حراس على عقول الشعب ولا تحاصرون تطلعاتهم نحو الحرية بفتاويكم ، ولا تتعاملوا على انكم نخبة الشعب واتركوا الشعب ليخرج يقول كلمته كما شاء فى 25 يناير القادم ، لا تكونوا أوصياء على شعب بأكمله

اتركوا العنان لطموحات الشعب وهو يختار ما يشاء فى الميدان بكلمته وهتافه الذى يدوى دائما فى الميادين

علاء عبد الهادى .. حلم سنين انتهى فى لحظة

لم يكن يتبقى له لاتمام دراسته سوى سنتين …  

  فمنذ ان حصل علاء على شهادة الثانوية العامة وجاءه خطاب التنسيق ليعلمه بالتحاقه بكلية الطب وهو ينتظر تلك اللحظة ، تلك اللحظة التى يتخرج فيها من الكلية ويحصل على لقب طبيب

ولكن حينما جاءه الاختيار ليختار ما بين حلم حياته بالتخرج او ان يختار الحرية لبلاده ؛ أبى الا يختار الا حرية بلاده لتكتب النهاية لقصة كفاح استمرت لمدة 23 سنة ، لتكتب نهايته برصاصة غاشمة من جيش بلده التى اختارها وأصر على تحريرها ولفظ انفاسه الاخيرة بميدان تحريرها

مات ولكن اسمه لن يترك الكلية ، فلربما سيمسح اسمه من كشوف أسماء الطلبة ولكنه سيظل محفورا فى تراب كليته بحروف تلمع ، مسح اسمه من كشوف أسماء الطلبة ليكتب اسمه فى كشوف الابطال فى كليته ؛ فما اكثر الطلبة بكلية الطب بجامعة عين شمس ولكن الابطال هم عملة نادر ان تجدها بينهم

وداعا يا علاء يا من ناضلت لأجل وطنك وأعطيته حياتك ولم تنتظر لتجد مقابل فثوابك عند ربك الذى خلقك اعظم بكثير

سيظل اسمك بالكلية شاهدا على بطولاتك ورمزا للدفعات والاجيال القادمة ليتعلموا منك معنى الحرية

نصدق انهى سامى عنان فى الاتنين؟

نصدق انهى سامى عنان فى الاتنين؟

الاولى من جريدة الانباء الكويتية بتاريخ 15 مارس 2011 وبيقول ان جالهم اوامر رئاسية بسحق المتظاهرين

الثانية من جريدة الوفد بتاريخ 8 اكتوبر 2011 وبيقول لم نتلق اوامر بقتل المتظاهرين

طب اصدق انهى واحد فى الاتنين سامى عنان بتاع مارس ولا سامى عنان بتاع اكتوبر؟؟ ولو واحدة من الاتنين ملفقة الخبر ليه مردش عليهم؟ مش ده مساس باحد افراد المؤسسة العسكرية اللى عمالين يقوللنا خط احمر عليها؟

بالمناسبة عشان الموسوسين واصحاب العقول العبقرية امثال عمرو مصطفى دى لينكات الاخبار من على موقع الجريدتين الرسمى

http://www.alanba.com.kw/ArchivePDF/PDF/2011/03/15-03-2011/47.pdf

http://goo.gl/owgBl

احداث ماسبيرو 4 اكتوبر

بالصدفة كان ورايا مشوار فى شبرا وانا معدى شفت تجمعات من المسيحيين فى دوران شبرا فسألت رايحين فين عرفت انهم طالعين بمسيرة على ماسبيرو قلت هروح مشوارى وارجع اعدى على هناك اشوف ايه النظام هناك

وفعلا روحت هناك وصلت على الساعة 8 مساء تقريبا , لفت نظرى الاعداد الموجودة من الامن المركزى اللى مقفلة الطريق بعرض الكورنيش صفين تقريبا غير اللى قافلين الشارع اللى على ناصيته الهيلتون , ودخلت لقيت عدد الناس جوة مش العدد اللى هو يخوف يعنى ميتجاوزش 5 الاف على اقصى تقدير , بس عجبنى الوضع اوى خاصة ان المظاهرة دى كان معظم ان لم يكن كل الهتافات موجهة ضد المشير والمجلس العسكرى بعكس اعتصامات المسيحيين اللى قبلها

ومع مرور الوقت ابتدى يجى تعزيزات امن باعداد هايلة حتى وصل اعدادهم انهم عاملين اكتر من 6 صفوف امن مركزى على حد ما قدرت اشوف بعرض طريق الكورنيش وموجود معاهم فى النص كذة كتيبة شرطة عسكرية وجت عربيتين امن مركزى كمان للشارع اللى على ناصيته الكورنيش , ومن المدخل التانى جه مدرعتين جيش ومعاهم واحدة جيب شايلين جيش غير اللى نزلو العساكر بتوعهم بعيد , وابتدوا مرة واحدة يقفلو علينا وحصرونا فى محيط مبنى ماسبيرو بس الناس اتجمعوا ووقفولهم عل ناحيتين رجعوهم لورا ورجع الوضع زى ماكان هادى

ابتديت الاحظ وجود رتب كبيرة من الشرطة والجيش والامن المركزى وشوفت حمدى بدين رئيس الشرطة العسكرية وساعتها اتأكدت انهم هيضربو وهيفضو الاعتصام اللى الناس كان ابتدت تحضرله , وابتدى يحصل شوية احتكاكات بسيطة حتى ان واحد من الموجودين شتم حمدى بدين فى وشه هو والمشير والناس سحبوه لجوة وطبعا حمدى بدين قعد يزعق شوية عشان يعمل دكر قدام العساكر بتوعه

وعلى الساعة 1 صباحا تقريبا سمعت صوت ضرب رصاص صوت فى الهوا وابتدى الهجوم … اتحركت الشرطة العسكرية على جوة معاهم الشرطة العادية (مش الامن المركزى) والناس ابتدت تجرى بس مش عارفين نروح فين لانهم محاصرينا من كل ناحية يدوب الناس ابتدت تخرج الستات الموجودة من فتحة وحيدة كانت على شارع الهيلتون , وطلعو عل منصة الصغيرة اللى كانت قدام ماسبيرو كسروها وخدو السماعات وابتدو يعتقلو فى ناس ويضربو الناس مش مفرقين بين حد لا كبير ولا صغير لامسلم ولا مسيحى (انا شفت شاب مسلم بيعيط من كتر ما اتضرب ) حتى انهم ضربوا القسس اللى كانو موجودين واعتقلوهم بعدين طلعوهم

اتجمعنا ورجعنا تانى من ورا الكردون بتاعهم ورجعنا نهتف تانى طلعو يجرو ورانا جرريو ورانا من ماسبيرو لغاية موقف عبد المنعم رياض وهناك فى ناس لقت طوب وابتدت تحدفهم بالطوب بعد مجرونا بالرصاص فى الهوا قدامهم , وعدت قدامنا عربية امن مركزى فاضية الناس حدفوها بالطوب فى تكرار لمشهد من المشاهد يتاعة جمعة الغضب

فى حاجة نسيت اقولها ان فى ناس قالو انهم سمعو بدين بيكلم رتبة اعلى منه وبدين قاله “تمام يا فندم ساعة وهمشيهملك” وفعلا بعدها بساعة تقريبا او اكتر الضرب ابتدى

شهادة لازم اقولها عل شوفته انا مشفتش اى امن مركزى بيضرب رغم اعدادهم الكبيرة , اللى ضربو هم الشرطة العسكرية واللى كان بيقع فى ايديهم بيتلمو عليه بالعصيان اكنهم مسكو اسرائيلى ممكن يتلم عشرين على واحد

والشرطة العادية بزيها الابيض شاركت مع الشرطة العسكرية فى عملية فض الاعتصام بس اللى طاردنا كانو الشرطة العسكرية

فى الاخر هى كلمة عايز اقولها الشرطة العسكرية اللى تدخل عمر مكرم بالجزم وتعتدى عل مسيحيين عند ماسبيرو لا دين لهم…ومش هناخد حريتنا الا بتجمعنا تانى زى ما كنا فى التحرير لان قوتنا فى عددنا … نتقابل فى ميدان التحرير ميدان الحرية

ده فيديو من الاحداث مش انا اللى مسجلو بس بيبين الوحشية فى الاعتداء

شهادة المشير

توضيح: الشهادة اتنشرت, بنحاول نعيد نشرها من أكبر عدد ممكن عشان ماحدش يتاخد بسبب كسر حظر النشر, طبقا للرابط ده اول من خرق حظر النشر كان التليفزيون المصري و تعمد الكذب

 http://www.25jan-news.com/article.php?id=4799

ولو عايزين يحاسبو يبقو يحاسبو النيويورك تايمز عشان اخترقت الحظر هى كمان

http://www.nytimes.com/2011/09/25/world/middleeast/tantawi-testifies-at-mubaraks-trial-in-egypt.html?_r=3

لو مهتم تشيل معانا جزء من المسؤولية اعد نشر الشهادة باسمك, او اكتفي بقرائتها …جاري تحديث الشهادة

 س١ : حصل اجتماع يوم 22 يناير، هل ورد إلي رئيس الجمهورية السابق ما دار في هذا الاجتماع وما أسفر عنه وما كان مردوده ؟

ج1 : الاجتماع كان برئاسة رئيس الوزراء واعتقد أننه بلغ

 س2 : بداية من أحداث 25 يناير وحتي 11 فبراير هل تم اجتماع بينك وبين الرئيس السابق حسني مبارك ؟

ج2 : ليست اجتماعات مباشرة ولكن يوم 28 يناير لما أخذنا الأمر من السيد رئيس الجمهورية كان هناك اتصالات بيني وبين السيد الرئيس ؟

س3: ما الذي أبداه رئيس الجمهورية في هذه اللقاءءات ؟

ج3: اللقاءات بيننا كانت تتم لمعرفة موقف القوات المسلحة خاصة يوم 28 وعندما كلفت القوات المسلحة للنزول للبلد ومساعدة الشرطة لتنفيذ مهامها يتبع ج٣-2: كان هناك تخطيط مسبق للقوات المسلحة وهذا التخطيط يهدف لنزول القوات المسلحة مع الشرطة وهذه الخطة تتدرب عليها القوات المسلحة يتبع ج٣-3: القوات المسلحة بتنزل لما الشرطة بتكون محتاجة المساعدة وعدم قدرتها علي تنفيذ مهامها وأعطي الرئيس الأمر لقائد القوات المسلحة – يتبع ج٣-4 : أعطي الرئيس الأمر لقائد القوات المسلحة اللي هي نزول القوات المسلحة لتأمين المنشآت الحيوية وهذا ما حدث

س4 : هل وجه رئيس الجمهورية السابق المتهم محمد حسني مبارك أوامر إلي وزير الداخلية حبيب العادلي باستعمال قوات الشرطة القوة ضد المتظاهرين؟ يتبع س٤-2: استعمال قوات الشرطة القوة ضد المتزاهرين بما فيها استخدام الاسلحة الخرطوش والنارية من 25 يناير حتي 28 يناير ؟

 ج4 : ليس لدي معلومات عن هذا واعتقد ان هذا لم يحدث

 س5: هل ترك رئيس الجمهورية السابق للمتهمين المذكورين من أساليب لمواجهة الموقف ؟

 ج5 : ليس لدي معلومات

 س6: هل ورد أو وصل إلي علم سيادتك معلومات أو تقارير عن كيفية معاملة رجال الشرطة ؟

 ج6 : هذا ما يخص الشرطة وتدريبها ولكني أعلم ان فض المظاهرات بدون استخدام النيران

 س7 : هل رصدت الجهات المعنية بالقوات المسلحة وجود قناصة استعانت بها قوات الشرطة في الأحداث التي جرت؟

 ج7 : ليس لدي معلومات

س8 : تبين من التحقيقات إصابة ووفاة العديد من المتظاهرين بطلقات خرطوش أحدثت إصابات ووفيات..هل وصل ذلك الأمر لعلم سيادتك وبم تفسر ؟

 ج8: إنا معنديش معلومات بكده.. الاحتمالات كتير لكن مفيش معلومة عندي

 س9 : هل تعد قوات الشرطة بمفردها هي المسئولة دون غيرها عن إحداث إصابات ووفيات بعض المتظاهرين ؟

 ج9 : إنا معرفش ايه اللي حصل

 س10 : هل تستطيع سيادتك تحديد هل كانت هناك عناصر أخري تدخلت ؟

 ج10 : هيا معلومات غير مؤكدة بس اعتقد ان هناك عناصر تدخلت

 س11 : وما هي تلك العناصر ؟

 ج11 : ممكن تكون عناصر خارجة عن القانون

 س12 : هل ورد لمعلومات سيادتك ان هناك عناصر اجنبية قد تدخلت ؟

 ج12 : ليس لدي معلومات مؤكدة ولكن ده احتمال موجود

س13 : وعلي وجه العموم هل يتدخل الرئيس وفقا لسلطته في ان يحافظ علي أمن وسلامة الوطن في إصدار أوامر أو تكليفات في كيفية التعامل ؟

ج13 : رئيس الجمهورية ممكن يكون أصدر أوامر – طبعا من حقه ولكن كل شئ له تقييده المسبق وكل واحد عارف مهامه

 س14 : ولمن يصدر رئيس الجمهورية علي وجه العموم هذه الأوامر ؟

 ج 14 : التكليفات معروف مين ينفذها ولكن من الممكن ان رئيس الجمهورية يعطي تكليفات مفيش شك

 س15 : وهل يجب قطعا علي من تلقي أمر تنفيذه مهما كانت العواقب ؟

ج15 : طبعا يتم النقاش والمنفذ يتناقش مع رئيس الجمهورية وإذا كانت الأوامر مصيرية لازم يناقشه

 

س16: هل يعد رئيس الجمهورية السابق المتهم محمد حسني مبارك مسئول مسئولية مباشرة أو منفردة مع من نفذ أمر التعامل مع ألمتظاهرين الصادر منه شخصيا

 

ج16 : إذا كان أصدر هذا الأمر وهو التعامل باستخدام النيران أنا اعتقد ان المسئولية تكون مشتركة وأنا معرفش ان كان أعطي هذا الأمر أم لا

 

س17: وهل تعلم ان رئيس الجمهورية السابق كان علي علم من مصادره بقتل المتظاهرين ؟

 

 ج17: يسأل في ذلك مساعديه الذين ابلغوه هل هو علي علم أم لا

 

س18: وهل تعلم سيادتكم ان رئيس الجمهورية السابق قد تدخل بأي صورة كانت لوقف نزيف المصابين ؟

 

ج18 : اعتقد انه تدخل وأعطي قرار بالتحقيق فيما حدث وعملية القتل وطلب تقرير وهذه معلومات

 

س19: هل تستطيع علي سبيل القطع والجزم واليقين تحديد مدي مسئولية رئيس الجمهورية السابق عن التداعيات التي أدت إلي إصابة وقتل المتظاهرين ؟

 

ج19 : هذه مسئولية جهات التحقيق

 

 س20: هل يحق وفقا لخبرة سيادتكم ان يتخذ وزير الداخلية وعلي وجه العموم ما يراه هو منفردا من اجراءات ووسائل وخطط لمواجهة التظاهرات دون العرض علي رئيس الجمهورية؟

 

ج20: اتخاذ الاجراءات تكون مخططة ومعروف لدي الكل في وزارة الداخلية ولكن في جميع الحالات يعطيه خبر بما يخص المظاهرات ولكن التظاهر وفضه هي خطة وتدريب موجود في وزارة الداخلية

 

س21 : وهل اتخذ حبيب العادلي قرار مواجهة التظاهر بما نجم عنه من إصابات ووفيات بمفرده بمساعدة المتهمين الاخرين في الدعوى المنظورة وذلك من منظور ما وصل لعلم سيادتك ؟

 

 ج 21 : معنديش علم بذلك

 

س22 : علي فرض إذا ما وصلك تداعيات التظاهرات يوم 28 يناير إلي استخدام قوات الشرطة آليات مثل اطلاق مقذوفات نارية أو استخدام السيارت لدهس المتظاهرين..هل كان أمر استعمالها يصدر من حبيب العادلى يصدر من حبيب العادلى ومساعديه بمفردهم ؟

 

ج 22 : ما أقدرش أحدد اللي حصل أيه ولكن ممكن هو اللى اتخذها وأنا ما أعرفش واللى اتخذها مسئول عنها

 

س23: هل يصدق القول تحديداً وبما لا يدع مجالاً للشك أو الريبة أن رئيس الجمهورية السابق لا يعلم شيئاً أو معلومات أيا كانت عن تعامل الشرطة بمختلف قواتها أو أنه لم يوجه إلى الأول سمة أوامر أو تعليمات بشأن التعامل والغرض أنه هو الموكل إليه شئون مصر والحفاظ على أمنها ؟

 

ج23 : أنا ما أعرفش اللى حصل أيه لكن أعتقد إن وزير الداخلية بيبلغ وممكن ما يكونش مش عارف بس أنا ما أعرفش

 

س24 : هل هناك اصابات أو وفيات لضباط الجيش ؟

 

ج 24 : نعم هناك شهداء

 

س25 : هل تعاون وزير الداخلية مع القوات المسلحة لتأمين المظاهرات ؟

 

ج 25 : لأ

 

س26 : هل أبلغت بفقد ذخائر خاصة بالقوات المسلحة؟

 

 ج26: مفيش حاجة ضاعت لكن هناك بعض الخسائر في المعدات واتصلحت ومفيش مشكلة

 

س27: هل أبلغت بدخول عناصر من حماس أو حزب الله عبر الأنفاق أو غيرها لإحداث إضرابات ؟

 

ج27 : هذا الموضوع لم يحدث أثناء المظاهرات واحنا بنقاوم الموضوع ده واللي بنكتشفه بندمره وإذا كان فيه حد محول لمحكمة فهذا ليس أثناء المظاهرات

 

س28: هل تم القبض على عناصر أجنبية في ميدان التحرير وتم إحالتهم للنيابة العسكرية ؟

 

 ج28: لا ..لم يتم القاء القبض على أى أحد

 

س29: فى الاجتماع الذي تم يوم 20 يناير هل تم اتخاذ قرار بقطع الاتصالات؟

 

ج29 : لم يحدث

 

س30: بعض اللواءات قالوا طلب منا فض المظاهرات بالقوة..هل طلب من القوات المسلحة التدخل لذلك ؟

 

ج30: أنا قلت فى كلية الشرطة في تخريج الدفعة إن أنا بأقول للتاريخ إن أي أحد من القوات المسلحة لن يستخدم النيران ضد الشعب

ايه الفرق بين الجيش والامن المركزى؟ الاتنين بيلعبوا صلح مع المواطن

انجازات العسكر فى 6 شهور

النهاردة اخر يوم فى اول 6 شهور تحت حكم المجلس العسكرى واللى وعد انه بعدهم هيسلم السلطة لجهة مدنية , واللى بناء عليه دعا الناس فى استفتاء 19 مارس للتصويت بنعم للاستقرار وسرعة تسليم الحكم لسلطة مدنية ….. الايام بتفوت بسرعة اوى والواحد مبيحسش بيها من سرعتها او يمكن من كتر الانجازات اللى المجلس العسكرى عمال يحققهالنا كل يوم الوقت فات بسرعة محسناش بيهم واللى هحاول اعد فيها ولو انى واثق انى مش هقدر احصرها لانها كتيرة اوى

1- ملف الامن وهو الاهم عند المواطن المصرى البسيط واللى معظم اللى صوتوا فى 19 مارس بنعم كان عشان يرجع تانى  , بس للاسف بعض المفسدين بيحاولوا يظهروا بعض مظاهر الفوضى عشان يغطوا على الامان اللى بقينا بنحس بيه فى الشارع يعنى ناخد لفة من قنا للعريش لجرجا ده غير بعض الحوادث القليلة الفردية اللى مات فيها كام الف واحد بس انما الامن بقى متين والحمد لله

2- العدالة الاجتماعية  ودى بقى بالذات تفوق المجلس العسكرى وحكومة شرف على نفسهم فيها…حد ادنى واقصى للاجور وكل الناس مبسوطة وزى الفل لدرجة انهم مبقوش عارفين يودوا الفلوس فين ابتدوا يلموا للشعب الصومالى عشان ظروف المجاعة اللى عندهم

3- شهداء اومصابى الثورة دول بقى فوق دماغنا من فوق على رأى الحج صفوت الشريف…علاج كل المصابين على نفقة الدولة وفى مستشفيات الدولة المتطورة , وتعويضات لكل شهيد او مصاب بس المبلغ هيبقى رمزى عشان طبعا حياة الانسان لا تقدر بمال

4- المعتقلين كلهم الحمد لله سابوا سجون الداخلية وسجون امن الدولة ونقلناهم لسجون الحربية عشان الخدمة هناك احسن ولاننا بنحترم القانون

5- رموز النظام السابق كلهم فى السجن حتى بالامارة اللى كانوا بيشككوا فى ذمتنا اهم شافوا مبارك فى القفص فقط بعد مرور 6 شهور لان احنا المحاكمات عندنا بتبقى سريعة

6- الاعلام والتليفزيون المصرى دول بقى اتغيروا 180 درجة … وسقط شعار عاش الرئيس اللى كانوا بيرفعوه  واصبح شعار واحد…لأا مش مصر …. بقى الشعار عاش المشير

7- حق التظاهر ده بقى بعد الثورة اكيد بقى  فرض على الحكومة لكل مواطن…اى حد دلوقتى عايز يتظاهر يتظاهر بس اهم حاجة مايناوئش المشير عشان بيزعل وبيشيل فى قلبه والزعل وحش عليه ده معدى السبعين برضو يعنى فى مقام جدو

….. بصراحة فى انجازات تانى كتير بس  نكتفى بدول دلوقتى عشان اى واحد بعد كده يطلع يقول يسقط العسكر يبقى يستاهل اللى يجراله…ربنا يخليهملنا ودايما حاكمنا ومظبطنا  وعقبال ما يتموا قرن فى الحكم مش 6 شهور بس

يا عم شرف دى ثورة مش مظاهرة

بيستفذنى جدا انى كل ما اشوف الدكتور عصام شرف الاقيه طالع فى التليفزيون يقول انه مسافر مش عارف فين عشان يحل ازمة ايه ويجيب فلوس منين ويشحت كام مليار من حتة تانية ,بحس ان احنا رجعنا لايام ما قبل الثورة … ولا وزير المالية سمير رضوان اللى تقريبا نسخة طبق الاصل من بطرس غالى

بحس ان احنا كنا فى مظاهرة عشان نغير حكومة , مش عملنا ثورة عشان نسقط نظام بأكمله…ونظام يعنى افراد وسياسة مش بس نغير افراد

فعند اختيار الوزاراء كانت نفس الالية فى الاختيار عواجيز مكحكحين مفيهومش واحد تحت ال 40 …. وكمان مننساش نحافظ للمسيحيين على نسبة الوزيرين فى الوزارة عشان مش عايزين حد يتكلم معانا حتى لو كنا هنسيب واحد زى ماجد جورج مبيعملش اى حاجة ولا حد سامعله صوت بس اهو عشان نكمل العدد…طب ليه منغيرش شوية؟ ليه ميبقوش اكتر؟ اه عشان السلفيين ميصدعوش دماغنا

اما اختيار المحافظين فكان هو المهزلة الاكبر … لازم نحط شرطة فيهم زى الاول حتى لو كنا طالعين من حاجة بيقولوا عليها ثورة كان احد اسبابها الرئيسية الشرطة مش مشكلة … ولازم برضو المحافظ يكون مكحكح عشان الدهن فى العتاقى…ونحط المحافظ المسيحى فى قنا

اما السياسة المالية فندور نقترض ونشحت شوية ونلم من هنا وهنا … ونبص فى الاخر نلاقى الحد الادنى للاجور 700 جنيه ونخالف حكم المحكمة اللى صدر…طب ما بطرس غالى عمله 400 وكان فى زيادة كمان سنوية فى المرتبات يعنى كان هيوصل حوالى 450 جنيه على شهر يوليو يبقى احنا عملنا ثورة عشان الحد الادنى يزيد 250 جنيه؟

والاهم كان المطلب الرئيسى اللى بيعبر عن اى ثورة فى العالم … فالمعروف ان اى ثورة تسقط دستور ويبدأ العمل الفورى على دستور جديد …. نلاقيهم بيعملولنا استفتاء على تعديلات دستورية زى اللى مبارك كان عايز يعملها قبل ما يمشى

الى قانون منع التظاهر اللى بيناقض اول جملة سمعناها من رئيس الوزراء فى التحرير… لما طلع عل منصة وقال يوم ما مش هقدر انفذ طلباتكم هنزل وابقى واقف معاكم…طيب ازاى يا دكتور شرف؟ انت متعرفش انك دلوقتى لو نزلت معانا التحرير من حق الشرطة العسكرية تخدك وتحبسك؟؟

هو واقع بيرصد اننا مغيرناش حاجة فى البلد واداء باهت للحكومة…كنت اتوقع بعد رحيل شفيق عن الوزارة اداء ثورى يجى شرف يحبس كل الناس اللى عليها كلام وما اكترهم حبس احتياطى بقانون الطوارئ اللى لسة الناس بتتحبس بيه لحد ما التحقيقات تخلص بدل ما كل يوم نسمع ان فلان برة وفلوس فلان راحت فين وجت منين وفلان دبر لفتنة طائفية وفلان جاب بلطجية فى التحرير

انما للاسف ولا حاجة حصلت وماشيين بأداء النملة … ومش كده وبس ل ورئيس الوزراء طالع يقول هعمل كتيب عن انجازاتى فى 100 يوم …. هو ممكن طبعا وكمان نسميه 100 يوم حول العالم…لانى باختصار يا دكتور شرف مشفتكش عملت حاجة غير السفر حول دول العالم

فهل تعتبرها بعد كل ده ثور ولا مظاهرة؟ عليك ان تصارح نفسك فيما انجزت خلال 100 يوم قبل ان تتحدث